掛靴仲有獎攞　卻奧斯當選德國足球先生

卻奧斯為德國踢完今屆歐國盃之後，正式結束球員生涯，但仍然有獎攞，獲德國記者協會選為2024年德國足球先生，亦係呢位34歲名將繼2018年之後，第2次獲此殊榮。

德國記者協會有751人參與投票，卻奧斯獲得285票排第1位，力壓有246票嘅利華古遜21歲中場新星科利安華迪斯，當選今年德國足球先生。奧卻斯2024年大豐收，協助皇馬奪得西甲及歐聯冠軍，並重返德國國家隊，出戰歐國盃，雖然「日耳曼兵團」8強止步，但卻奧斯表現仍然備受認同。

另外，利華古遜主帥沙比阿朗素以503票，大幅拋離第2位只有74票嘅史特加教練施巴斯坦漢尼斯，當選德甲最佳教練，沙比阿朗素上季率領利華古遜首次捧德甲冠軍，獲此殊榮絕對實至名歸。