阿仙奴將簽馬連奴　同奧迪加特重組冠軍拍檔

阿仙奴為挑戰英超冠軍，密鑼緊鼓再簽人增強實力，據報佢哋已接近完成收購西班牙中場米基爾馬連奴，呢位歐國盃冠軍球星轉會後，將會同馬田奧迪加特再度合作，兩位球星4年前曾喺皇家蘇斯達做隊友，而且仲拎到西盃冠軍添！

西班牙媒體報道，28歲嘅馬連奴已經同意加盟阿仙奴，由於佢同皇家蘇斯達只剩1年合約，阿仙奴可以用接近3,000萬歐元轉會費完成收購。馬連奴夏天協助西班牙贏歐國盃後，周二(6日)正式返去皇蘇報到，預計轉會日內正式拍板。

馬連奴已效力皇蘇6個球季，2020年贏過1次西盃冠軍，當年馬連奴嘅中場拍檔，就有由皇家馬德里借用嘅奧迪加特，依家奧迪加特已經係阿仙奴隊長，馬連奴加盟後會同佢再組「冠軍拍檔」，令球迷期待。