「新沙拿」借奧運上位　里昂出手搶購

埃及男子足球隊喺今屆奧運表現一鳴驚人，戰至4強加時僅不敵東道主法國，雖敗猶榮，有「新沙拿」之稱嘅23歲翼鋒伊巴謙艾度爾今屆已有3球進帳，並吸引法甲球隊里昂注意，準備今夏簽入佢。

身穿10號球衣伊巴謙艾度爾今屆奧運2次扮演救世主，包括最後1輪分組賽，個人梅開二度，協助球隊以2比1擊敗勁旅西班牙，並力壓對手，以小組首名出線。埃及8強對巴拉圭，落後之下靠伊巴謙艾度爾88分鐘入波逼和1比1，最後憑互射12碼勝出晉級，伊巴謙艾度爾負責最後1輪主射入網，盡顯大將風範。

雖然伊巴謙艾度爾未能協助埃及打入決賽，但已經贏盡口碑，法國同埃及傳媒都指里昂準備出手收購伊巴謙艾度爾，佢所屬埃及球隊金字塔開價550萬歐元(約4,700萬港元)，價錢抵到爛，相信成交機會甚大。

埃及將於季軍戰對摩洛哥，伊巴謙艾度爾踢完之後，可能留喺法國搵食。