費倫巴治遭絕殺　摩連奴霸氣回應

周三(7日)凌晨歐聯第3圈外圍賽首回合，由「寸王」摩連奴執教嘅費倫巴治踢到補時失第2球，作客以1比2慘遭里爾絕殺。不過，摩連奴仍然保持霸氣，呼籲對手次回合唔好「泊大巴」防守，並有信心可以反勝晉級。

摩連奴今季成為費倫巴治主帥之後，開局唔錯，上圈歐聯「雙殺」瑞士球隊盧加諾，但今仗對法甲球隊里爾，遇上重大挑戰，開賽12分鐘，中堅奧斯特禾德擺烏龍導致落後。

不過，呢支土耳其勁旅沉着應戰，搶番唔少攻勢，並喺79分鐘由艾芬卡域斯射入罰球扳平1比1，點知踢到補時，被後備上陣嘅里爾翼鋒施高華射入致勝1球。

摩連奴執教費倫巴治第3場正式賽事，首次輸波，賽後呢位葡萄牙名帥「鼓勵」里爾下周中次回合踢得進取啲，「寸王」似乎擔心對手一旦死守，可能令費倫巴治難以收復失地。