羅拔佬起孖救駕　但巴塞輸一樣嘢

周三(7日)早上「美國之旅」季前熱身賽，巴塞隆拿落後2球劣勢之下，憑35歲老將羅拔利雲度夫斯基梅開二度，逼和AC米蘭2比2，但互射12碼階段，巴塞有3人宴客落敗。

AC米蘭發動閃電戰，基斯甸普列錫傳中，由盧卡祖域近門撞入，跟住普列錫自己窄角度勁射入網，開賽15分鐘已經領先2球。巴塞隆拿隨即大反攻，22分鐘羅拔利雲度夫斯基喺禁區邊冷靜射入，換邊後呢位波蘭國腳接應傳中，凌空射入成2比2。

值得一提，巴塞隆拿22歲前鋒柏奧域陀今場貢獻1次助攻，連續3場創造入波，包括射入3球及1次助攻，成為球隊今夏熱身賽表現最搶鏡球員。

雖然今場係熱身賽，但打和需要互射12碼分勝負，頭5輪雙方各有2人射失，去到突然死亡階段，AC米蘭19歲小將施洛尼射入，巴塞隆拿後衞米卡爾菲爾宴客，最終A米互射12碼贏4比3。