巴謙戴亞斯1傳1射　皇馬拆「車」開齋

周三(7日)早上「美國之旅」季前熱身賽，皇家馬德里憑巴謙戴亞斯貢獻1次助攻及射入1球，以2比1擊敗車路士，踢到第3場熱身賽終於贏波。反觀由新帥馬利斯卡執教嘅車路士頻頻受挫，整支球隊仲有排執。

皇馬前2場熱身賽分別不敵AC米蘭、巴塞隆拿，今仗派出2位歸隊冇耐嘅巴西前鋒雲尼斯奧斯祖利亞、洛迪高高斯擔任正選，表現有明顯改善。

開賽19分鐘，巴謙戴亞斯殺入禁區，冷靜橫傳畀盧卡斯華斯基斯射入打開紀錄。8次分鐘之後，雲尼斯奧斯祖利亞直傳，巴謙戴亞斯單刀推過門將，窄角度射入成2比0。

車路士落後2球，先至如夢初醒傾力反擊，39分鐘安素費南迪斯長傳入禁區，馬杜基近門頂入。換邊之後，車仔翼鋒梅迪歷曾經有2次黃金機會，但都失之交臂，注定輸波。

車路士踢咗5場熱身賽只有1勝1和3負，合共失12球，防線非常脆弱，成為馬利斯卡首要解決問題。皇馬贏波之後，正好為出戰8月15日凌晨歐超盃對阿特蘭大壯行色。