唔怕中魔咒　舒克斯揀着曼聯11號

曼聯正式宣布，新加盟前鋒約舒亞舒克斯將會着11號球衣，自從傑斯退休騰出11號波衫之後，歷位繼承呢個冧巴嘅曼聯球員，表現都令人失望，呢位23歲荷蘭國腳小心中魔咒。

「曼9」安東尼馬迪爾今夏自由身離隊後，原本着11嘅海倫改着9號，換言之代表主力進攻球員嘅號碼，得番11號冇人要，最終由約舒亞舒克斯「硬食」。

曼聯11號屬於名宿傑斯嘅金漆招牌，但後來嘅繼承人都孭唔起呢個冧巴，包括贊奴沙、安東尼馬迪爾、格連活特、海倫着11號嘅球季，演出都欠佳，格連活特更加捲入家暴事件，事業幾乎毀於一旦。

海倫上季曾經陷入入球荒，被指踢唔出應有身價，難怪佢今季趁馬迪爾離隊，立即搶奪9號球衣希望轉運。

不過，約舒亞舒克斯並唔怕「11魔咒」，因為佢效力博洛尼亞首季都係着11號，上季先至改着9號，踢拜仁慕尼黑及荷蘭青年軍時期都着過11號，似乎同呢個冧巴特別有緣。