杜費斯同意續約國米　曼聯死心吧

早前有消息指曼聯計劃用雲比沙卡交換國際米蘭右後衞杜費斯，根據《Football Italia》最新爆料，杜費斯已經同意續約4年，打亂紅魔鬼換「閘」大計。

杜費斯將於明年夏天約滿，一度傳出呢位28歲荷蘭國腳無意續約，並打算轉投曼聯，跟同胞坦哈格搵食。國際米蘭近日使出「銀彈戰術」，向杜費斯開出400萬歐元(約3,400萬港元)年薪續約新條件，比佢現時年薪多近80萬歐元。據悉杜費斯見好就收，基本上已經同意續約4年。

杜費斯以助攻力強見稱，2021年由燕豪芬加盟國際米蘭之後，為呢支意甲勁旅上陣132場，射入11球及20次助攻，協助國米奪得1次意甲及2次意大利盃冠軍，佢同意續約，國米右路攻守就冇後顧之憂。