巴塞買唔起「尼威」　考慮轉簽基艾沙

巴塞隆拿原本計劃收購畢爾包翼鋒尼高拉斯威廉斯，拍住拉明耶馬「雙翼齊飛」，但由於呢位22歲西班牙國腳現時毀約金達6,000萬歐元(約5.1億港元)，加上會方即將收購RB萊比錫中場丹尼爾奧莫，難以再用重金買「尼威」，打算轉移目標，平簽祖雲達斯翼鋒費達歷高基艾沙。

費達歷高基艾沙將於明夏約滿，祖記新教練莫達已表明，無意留用呢位26歲意大利國腳，甚至要求佢盡快轉會。據悉基艾沙嘅經理人聯絡巴塞隆拿管理層，推薦呢位「星二代」畀對方，巴塞正在評估交易可能性。

費達歷高基艾沙擅長個人突破，屬於意大利奪得2021年歐國盃冠軍嘅功臣，但近年因為傷患問題，無復當年之勇，祖雲達斯願意以1,500萬至2,000萬歐元(約1.7億港元)出售佢，對於財政欠佳嘅巴塞隆拿而言，無疑係唔錯選擇。