雲比沙卡拒減薪離曼聯　寧坐1年等自由轉會

曼聯右閘雲比沙卡只剩1年合約，已被球會放入出售名單，據報曼聯更已同韋斯咸達成轉會協議，不過最新消息指雲比沙卡拒絕減薪轉會，如果曼聯唔肯向佢支付一筆巨額補償費，不惜坐到明年夏天再自由身走人。

曼聯已接納韋斯咸1,800萬鎊轉會費開價，並且傾掂拜仁慕尼黑嘅馬沙拉奧作代替，但轉會遲遲未扑槌，令組軍計劃受到拖延。據英國《太陽報》報道，韋斯咸未能負擔雲比沙卡9萬鎊周薪，呢位右閘亦無意作出讓步，佢嘅經理人正要求曼聯支付一筆巨額補償費，彌補佢轉會後嘅財政損失。

報道指雲比沙卡如果得唔到合適補償，佢寧願等到約滿再離隊，到時雲比沙卡仲可以喺新球會得到一筆簽字費。傳聞意甲勁旅國際米蘭對雲比沙卡亦好有興趣，如果呢位26歲守將未能轉會，國際米蘭喺明年1月就可以同佢簽定轉會協議，曼聯將落得人財兩失下場。