請職業扒手「教育」球員　阿迪達屎橋定奇招？

阿仙奴5年前請阿迪達執教後，由一支「高薪低能」球隊遙身變為年輕嘅爭標份子，阿迪達嘅改革亦成為唔少球會重建嘅模範。《The Athletic》日前刊登阿迪達對阿仙奴球場內外嘅改造，其中一段小故事就成為熱話，原來阿迪達曾經聘請一班「職業扒手」向球員落手，用呢件事教育球員，都唔知係屎橋定奇招！

文章分析阿迪達上任後，對阿仙奴球會文化、轉會、戰術、基建、心理等方面改造，其中一個故事，係阿迪達曾經喺次球隊聚餐入面，暗中聘用職業扒手，偷走球員嘅隨身物件，食完飯後阿迪達叫大家拎出身上嘅嘢，球員先發現電話、銀包等不翼而飛，阿迪達就借呢件事教育球員要時時刻刻打醒精神、隨時做好準備。

呢段故事曝光後，唔少網民都笑呢條「屎橋」同足球完全無關，亦唔覺得對球隊備戰有任何幫助，直指阿迪達「做多咗」。不過從結果論，阿仙奴近年表現確實不斷進步，連續2季同王者曼城鬥到最後一刻，阿迪達嘅「奇招」算係有所交代。