迪基亞回歸！同意簽約費倫拿天征戰意甲

西班牙門神迪基亞上年夏天離開曼聯後，一直未有落班，闊別球壇1年後終於重出江湖，據報呢位33歲門神已同費倫天拿達成協議，並安排飛去意大利做體測同簽約，將會征戰意甲賽場。

轉會權威Fabrizio Romano報道，迪基亞透過中介公司，同費倫天拿已就1+1年合約傾掂數，完成體測後就會正式簽約。費倫天拿對上2季都殺入歐協聯決賽，可惜2次都飲恨，今屆佢哋仍然會出戰歐協聯。

迪基亞前季仲係英超嘅「金手套」得主，離開曼聯後因為人工太高，令唔少有意斟介嘅球會卻步，消息指佢今次答應減薪簽約費倫天拿，年薪為200萬歐元，另有100萬歐元獎金條款。