唔係講笑！湯馬士梅拿為德國奪奧運金牌！

德國足球名將湯馬士梅拿球員生涯獲獎無數，世界盃冠軍、世界盃神射手都拎過，上月宣布退出德國隊嘅佢，日前再次為國爭光，而且仲係拎到奧運金牌！原來德國日前喺馬術個人越野障礙賽奪金，騎師古卻克所策騎嘅Checker，正正係湯馬士梅拿擁有！

古卻克同Checker喺周三(7日)合作贏得馬術個人越野障礙賽金牌，打破德國馬術28年來奧運個人賽金牌荒。有趣嘅係，Checker嘅主人原來係足球名將湯馬士梅拿，呢位34歲球星隨後喺社交網開直播，頸上掛住2014年世界盃金牌嘅佢表示：「金牌！我哋係奧運冠軍！你(古卻克)過去1年半為Checker所做嘅事令人欽佩，依家好好咁去享受啦！」

湯馬士梅拿亦不忘多謝拜仁慕尼黑新教練高柏尼，因為佢將朝早嘅練習改喺下晝進行，令湯馬士梅拿可見睇直播見證愛駒封王。湯馬士梅拿向來鍾情馬術，佢老婆麗莎就係馬術盛裝舞步選手，兩公婆亦擁有自己嘅馬房，麗莎曾經表示湯馬士梅拿騎術非常了得，將來退役唔踢波，隨時可以轉行做馬術運動員。