曼聯6位後衞缺陣社區盾　17歲小將有望擔正

上屆英足盃冠軍曼聯將於周六(10日)晚社區盾對上季英超冠軍曼城，大戰前夕，紅魔鬼爆出不利消息，有6位後衞因為受傷或者狀態不足，好可能缺陣今場比賽，領隊坦哈格或需要派出17歲小將哈利阿馬斯擔任正選。

曼聯新簽中堅約羅早前受傷，需要抖3個月，左後衞杜維爾馬拉西亞仍然復出無期，哈利馬古尼、域陀連迪路夫、雲比沙卡有傷在身，左閘勞基梳爾踢完歐國盃決賽後，剛放完假歸隊，狀態不足。坦哈格現時手上只有利辛度馬天尼斯、莊尼伊雲斯2位中堅可用，右閘得番達洛治。

英國《每日郵報》指坦哈格有可能派哈利阿馬斯上陣對曼城，呢位左後衞有份參加「美國之旅」季前熱身賽，並且3場都擔任正選，可見坦哈格非常器重呢位新星，今季有機會上位。