【官宣】車路士今夏第8簽　幾多個會係正選？

英超豪門車路士周五(9日)宣布，以約1,500萬鎊轉會費簽入小保加新星安素文奴，不過呢位19歲小將會即刻被外借返去小保加1季。安素文奴係車路士今夏第8宗收購，總花費超過1.1億鎊，但能夠搶到正選位置嘅似乎唔多，正選陣容戰力提升令人懷疑。

擔任中堅嘅安素文奴同車路士簽署7年長約後，新球季會繼續留喺小保加磨練，佢係車路士夏天第8個新加盟球員，另外7個包括18歲小將基利文、艾達拉比奧約、馬克基爾、達斯貝利賀爾、連拿度維加、卡納比韋利同門將佐真遜，總轉會費達1.1億鎊。

8名新兵大部份都係20歲左右年輕球員，除自由身加盟嘅中堅艾達拉比奧約同高價簽入嘅中場達斯貝利賀爾，有機會競逐正選位置外，其餘都係長遠培訓用途。消息指車路士增兵計劃仍未停止，預料即將簽入西班牙奧運隊前鋒奧羅莫迪安。