曼聯買烏加迪失敗　轉斟尤索夫科芬拿

曼聯原本計劃收購巴黎聖日耳門(PSG)中場文路爾烏加迪，但呢間法甲豪門企硬要求7,000萬歐元(約6億港元)轉會費，紅魔鬼會方認為價錢太昂貴，決定放棄，並轉斟另一支法甲球隊摩納哥嘅中場尤索夫科芬拿，估計3,500萬歐元(約3億港元)有交易，比文路爾烏加迪便宜一半。

根據《天空體育》爆料，曼聯已經派人接觸尤索夫科芬拿，力邀佢成「魔」，呢位25歲法國國腳將於明年6月底約滿，目前無意續約，摩納哥為免明夏人財兩失，希望盡快出售佢，估計曼聯只需要支付3,500萬歐元就可以成事。

雖然意甲球隊AC米蘭都有意收購尤索夫科芬拿，但相信難以開出比曼聯更優厚嘅薪酬待遇，佢加盟紅魔鬼嘅機會比較大。

尤索夫科芬拿出身於斯特拉斯堡青訓系統，2020年加盟摩納哥，踢法攻守兼備，為摩納哥上陣175場入7球，曼聯希望簽入佢代替卡斯米路。

另外，尤索夫科芬拿曾經為法國國家隊21次披甲入3球，有份出戰上屆世界盃及今屆歐國盃，但主要擔任後備。