【官宣】迪基亞加盟費倫天拿　人工縮水95%

前曼聯門將迪基亞「失業」超過1年之後，終於有班落，意甲球會費倫天拿正式宣布同呢位33歲西班牙鋼門簽約1年，並有權延長多1年合約。費倫天拿將於8月18日凌晨新一季意甲首輪聯賽作客對帕爾馬，迪基亞有望粉墨登場。

迪基亞近期同熱拿亞、蒙沙等多支意甲扯上關係，最終加盟費倫天拿，但年薪只有100萬歐元(約850萬港元)，相比曼聯時期嘅1,950萬鎊(約1.9億港元)年薪，大幅縮水近95%。不過，如果迪基亞表現好，續約多1季，第2季可以加1倍人工至200萬歐元年薪。

迪基亞上年夏天約滿，即使獲得代表2022/23年度英超最佳門將嘅「金手套獎」，但由於薪酬太高，被曼聯放棄。

其實以往傳出多支沙特阿拉伯豪門出高薪吸引迪基亞加盟，但佢卻拒絕，依家寧願「減薪」95%都要留喺歐洲5大聯賽，似乎佢只係為興趣踢波。