卡尼接班人　熱刺同意破紀錄收購蘇蘭基

熱刺上年夏天將首席射手哈利卡尼出售畀拜仁慕尼黑之後，鋒線實力大受削弱，未能打入上季英超前4位，會方痛定思痛，決定今夏重金買前鋒。根據英國《每日郵報》爆料，熱刺已經同意以破球會史上最高轉會費紀錄6,500萬鎊(約6.45億港元)收購般尼茅夫射手蘇蘭基，等佢通過體測，就會簽約6年。

蘇蘭基現時同般尼茅夫仲有5年合約，當中包含6,500萬鎊買斷條款，熱刺今次決定直接用呢金額收購佢，般尼茅夫冇得反對。

現年26歲嘅蘇蘭基出身於車路士青訓系統，其後轉投利物浦，但不獲重用，2019年加盟般尼茅夫，曾經同球隊一齊降落英冠比賽2季。呢位英格蘭國腳上季英超上陣38場入19球，表現大熟大勇，吸引熱刺大破慳囊收購。

值得一提，如果熱刺最終以6,500萬鎊買斷蘇蘭基，佢嘅前度效力球會利物浦可以分到900萬鎊。