阿特蘭大簽入列迪古　馬迪爾慘遭搶飯碗

阿特蘭大前鋒施卡馬卡早前踢熱身賽受重傷，需要抖半年，一度傳出會方有意簽入今夏約滿離開曼聯嘅安東尼馬迪爾做「替工」。不過，阿特蘭大最新公布，已經簽入意大利國腳前鋒列迪古，意味馬迪爾仍然未有球會收留。

據悉阿特蘭大今次斥資2,800萬歐元(約2.38億港元)向熱拿亞收購列迪古，可見對呢位25歲前鋒寄予厚望。列迪古本身喺阿根廷出世，由於有意大利血統，上年3月獲當時意大利主帥文仙尼徵召入國家隊，4個月之後更加由小保加加盟熱拿亞。

列迪古上季為熱拿亞踢29場聯賽入7球及2次助攻，並有份參加今屆歐國盃，上陣4場只有1場擔任正選。

阿特蘭大周六(10日)凌晨熱身賽對聖保利，列迪古後備上陣，但球隊輸0比3，下仗將於8月15日凌晨歐超盃對皇馬，列迪古有望踢正選。