【有片】蘇蘭基火影現身　熱刺靠佢打救

熱刺周六(10日)官方宣布，成功由般尼茅夫收購英格蘭前鋒蘇蘭基，據報轉會費為破球會紀錄嘅6,500萬鎊。蘇蘭基向來係日本動漫迷，熱刺亦為佢加盟製作一段漫畫式影片，領隊普斯迪高路表明佢會喺英超開鑼戰披甲。

26歲嘅蘇蘭基情迷日本動漫，之前就曾經喺入波之後，拎出《火影忍者》入面宇智波帶土嘅面具嚟慶祝，熱刺社交網喺宣布蘇蘭基加盟嗰陣，亦喺合約旁放上帶土嘅面具，之後更有一段動漫式影片宣布蘇蘭基正式加盟，相當隆重。

蘇蘭基加盟影片：https://x.com/i/status/1822242162647396702　

熱刺周六友賽拜仁慕尼黑一仗，蘇蘭基開波前現身獲球迷熱烈歡迎，雖然熱刺呢場熱身賽輸2比3，不過領隊普斯迪高路就對英超信心十足：「蘇蘭基跟足晒季前熱身，開鑼戰上陣完全冇問題，我相信佢可以即刻交到貨，上季我哋開咧前3日簽雲迪雲，即刻派佢上陣一樣掂！」