利物浦未買人先賣人　卡華路轉投賓福特

英超勁旅利物浦今夏仍然未簽入新球員，但繼續有人離隊，根據「轉會權威」記者羅曼諾(Fabrizio Romano)爆料，紅軍將中場法比奧卡華路出售畀賓福特，獲得2,000萬鎊(約2億港元)轉會費收入，莫非新領隊施洛認為現有人腳已夠爭標？

利物浦2年前以500萬鎊向富咸收購法比奧卡華路，但呢位21歲葡萄牙新星不受重用，2022/23年球季英超僅上陣13次入2球，上季更加分別被外借去德甲球隊RB萊比錫及英冠球隊侯城。紅軍新帥施洛做法比前任領隊高普更決絕，乾脆將法比奧卡華路賣走。

事實上，利物浦中場前猛將如雲，即使法比奧卡華路離隊，影響亦不大，加上獲得2,000萬鎊新資金，施洛可以選擇買其他心頭好，最大機會簽入皇家蘇斯達中場蘇比文迪，估計呢位25歲西班牙國腳身價達5,100萬鎊(約5.1億港元)。