艾達臣落實留隊　哥迪奧拿鬆一口氣

曼城門將艾達臣摩拉斯喺社區盾撲出查頓辛祖主射嘅12碼，並自己主射入1球，成為捧盃功臣，領隊哥迪奧拿表示，呢位即將31歲巴西鋼門已拒絕沙特阿拉伯球會肥約利誘，會繼續留隊搏殺，消除一大不明朗因素。

早前曾經傳出2支沙特豪門艾納斯及伊蒂哈德提出簽艾達臣摩拉斯，向佢開出90萬鎊周薪(約900萬港元)天價合約，但一直未有下文。哥迪奧拿最新話呢位主力一定留隊：「我極之相信2位門將艾達臣摩拉斯、史堤芬奧迪加會留隊，特別係艾達臣，佢好有魅力，水準穩定，如果失去佢，球隊冇可能取得佳績，我好高興佢選擇留隊。」艾達臣摩拉斯已效力曼城7季，上陣超過300場。

艾達臣摩拉斯現時周薪為10萬鎊，據悉會方準備加佢75%人工，達到17.5萬鎊(約175萬港元)周薪，雖然遠不及沙特球會闊綽，但總算係對艾達臣摩拉斯一種肯定。