列斯占士又傷　英超開季唔使預佢！

車路士今個夏天繼續瘋狂增兵，不過隊長列斯占士嘅傷患仍然令人頭痛，據報佢日前練習期間大腿再次受傷，雖然傷勢唔算嚴重，但車路士為穩陣起見，季初賽事未必會畀佢冒險上陣。

據《The Athletic》報道，列斯占士喺上場熱身賽對皇家馬德里被換走後，最近練習覺得大腿不適，即使球會方面形容佢嘅傷患「輕微」，但呢位24歲球星傷患史太厚，近5年至少6次大腿受傷，因傷缺席咗82場聯賽，所以車路士將會用最小心方法應對今次受傷。

列斯占士上季英超煞科戰食紅牌，新球季頭3輪聯賽都要停賽，雖然今個月兩場歐協聯賽事可以上陣，但依家車路士未必夠膽派佢上陣，可能畀佢直接抖到9月國際賽期後先復出，法國球星馬路古士圖會頂住右閘位置。