利物浦強陣晒冷！1日2踢熱身賽1勝1和

新一季英超即將展開，由施洛執教嘅利物浦展示鼎盛軍容，周日(11日)大晒冷一口氣連踢2場熱身賽，先係主場4比1大炒西維爾，再喺閉門作賽下0比0打和拉斯彭馬斯，上陣球員達到31人，雄厚陣容足夠派出兩隊接力比賽，顯示爭標實力！

利物浦夏天雖然仍未有重大增兵，不過佢哋本身已經有龐大陣容，周日本身安排喺晏菲路對西維爾做最後熱身，但施洛有感陣容太巨大，唔夠時間分配畀球員落場，所以臨時搵埋另一西甲球隊拉斯彭馬斯「拍跳」，就算唔夠時間安排賣飛賺錢，閉門作賽都要踢多場。

利物浦先對西維爾，憑迪亞高祖迪、路易斯迪亞斯(2球)同17歲小將尼奧尼入波，4比1大勝一場；之後輪到達雲紐尼斯、加普、遠藤航等球星領軍嘅第2隊上陣，同拉斯彭馬斯踢成0比0平手。2場比賽合共有31個球員有份上陣，總計5場季前熱身賽，利物浦有4勝1和佳績，施洛領軍完全冇退步憂慮。

荷蘭主帥施洛賽後表示：「以利物浦嘅規模，總係會搵機會加強球隊，但你睇到今日2場比賽，就知呢支球隊要加強嘅空間唔多。我承繼咗一支好強大嘅球隊，只有搵到真正令球隊進步嘅球員，我哋先需要出手買人。」

【對西維爾陣容】

艾利臣比加

阿歷山大阿諾特‧查洛爾昆沙‧華基爾雲迪積克‧森美卡斯

蘇保斯拉爾‧賴恩格雲貝治‧阿歷斯麥亞里士打

穆罕默德沙拿‧迪亞高祖達‧路易斯迪亞斯

後備上陣：查路斯(門將)‧尼安尼‧史堤芬遜‧巴斯迪‧祖高美斯‧摩頓

【對拉斯彭馬斯陣容】

基利靴

干拿巴特利‧伊巴希馬干拿迪‧尼達利菲臘斯‧安德魯羅拔臣

哈維艾利洛‧遠藤航‧居迪斯鍾斯

賓杜克‧達雲紐尼斯‧加普

後備上陣：史簡倫‧摩頓‧貝理亞‧拿路