轉會急轉彎！祖奧菲歷斯神奇返車路士？

車路士喺轉會市場全速開動，佢哋同馬德里體育會嘅交易談判，周一(12日)突然緊急「轉彎」！車路士原本傾掂3,500萬鎊收購西班牙前鋒奧莫羅迪安，點知體測前突然出現「嚴重問題」令轉會告吹，馬體會賣人失敗將影響佢哋收購干拿加歷查同祖利安艾華利斯，消息指兩會決定「轉章」，洽談祖奧菲歷斯重返車路士！

呢個轉會骨牌效應相當離奇，馬體會打算賣走「奧運腳」奧莫羅迪安後，收購干拿加歷查同祖利安艾華利斯，點知奧莫羅迪安交易因不知名原因突然告吹，車仔同馬體會都唔想干拿加歷查嘅交易被影響，依家就轉傾祖奧菲歷斯轉會，呢位葡萄牙國腳嘅經理人佐治文迪斯，啱啱先完成柏度尼圖轉會車路士手續，依家就留喺倫敦繼續談判。

祖奧菲歷斯喺上年1月曾以借將身份效力車路士半季，踢16場聯賽有4個入波，表現算係不過不失，上季外借去巴塞隆拿有回勇迹象，不過巴塞隆拿並冇打算將佢收購。