熱刺中場腦殘自爆　吸笑氣片曝光即道歉

熱刺喺英超開季前爆出醜聞，中場主將比蘇馬喺社交網「自爆」吸笑氣影片，而英國上年已經立法禁止管有或使用笑氣作為娛樂用途。比蘇馬知道出事後即公開道歉，承認自己判斷出錯。

比蘇馬2年前由白禮頓加盟熱刺，上季表現突出，周六(10日)熱身賽主場2比3輸畀拜仁慕尼黑後，佢同朋友去夜店開P，期間喺自己嘅Snapchat帳戶發放片段，見佢同朋友齊齊吸笑氣，不斷大笑表現勁High。

英國衛生部門指出，大量使用笑氣可能會導致貧血，嚴重情況會導致神經損傷或癱瘓，所以英國上年已立法禁止管有或使用笑氣作娛樂用途，濫用笑氣者可被罰款或最高監禁2年。

比蘇馬知衰後急亡補鑊，發聲明表示：「我要為呢段影片道歉，我作出錯誤判斷，我明白咁做對健康有嚴重危險，亦知道自己作為球員嘅模範作用。」熱刺就希望大事化小，只表示會內部處理。

比蘇馬已經唔係第一次捲入場外是非，佢喺2021年效力白禮頓嗰陣，曾喺夜店被指控強姦而被捕，調查接近1年後警方因證據不足撤銷指控。