曼聯貼500萬鎊送走　雲比沙卡終投韋斯咸

曼聯轉會行動加速，傾掊「打包」收購拜仁中堅馬菲斯迪歷特同鐵閘馬沙拉奧後，賣雲比沙卡去韋斯咸嘅轉會亦終於「拆掂」。據報曼聯答應支付雲比沙卡一筆500萬鎊補償金，令佢同意減薪過檔。

曼聯早已同韋斯咸傾掂1,500萬鎊轉會費，不過「錘仔幫」就畀唔起雲比沙卡9萬鎊周薪，呢位26歲右閘就要求曼聯提供人工補償，英國著名記者Ben Jacobs報道，曼聯同意支付500萬鎊畀雲比沙卡，彌補佢轉會後收入下降嘅差額，令轉會得以順利完成。

26歲嘅雲比沙卡5年前由水晶宮加盟曼聯，當時轉會費高達5,000萬鎊，不過呢位右閘除攔截力強之外，防守經常失位而成為漏洞，領隊坦哈格今個夏天終於忍唔住將佢踢走。