般費將續約至2027年　勢成曼聯「打工皇帝」

曼聯今夏積極增兵之餘，亦不忘留住主力，根據英國《太陽報》及「轉會權威」記者羅曼諾(Fabrizio Romano)爆料，會方已經同隊長般奴費南迪斯達成續約協議，雙方將延長合約至2027年，呢位29歲葡萄牙國腳可獲得最少35萬鎊(約350萬港元)周薪，同卡斯米路睇齊，成為紅魔鬼最高人工球員之一。

般奴費南迪斯原本合約2026年屆滿，曼聯上季英超僅排第8位，令呢位葡萄牙國腳意興闌珊，曾經暗示唔排除今夏離隊。不過，曼聯新股東拉特克利夫及領隊坦哈格都認為般費係球隊不可缺少一員，所以積極遊說佢續約，結果雙方達成協議，續約至2027年，並有權再續約多1年。般奴費南迪斯可以獲得大幅加薪，由現時22萬鎊周薪，增加至最少35萬鎊。

般奴費南迪斯2020年由士砵亭加盟曼聯以來，累積英超上陣159場入54球及41次進攻，佢除咗司職中場之外，亦不時客串前鋒，技術非常全面，曼聯不惜重金綁實佢，可以保持實力及有助穩定軍心。