阿仙奴第3作客球衣登場　網民：向曼城致敬？

阿仙奴公布新一季第3作客球衣，立即引起爭議，因為用淺藍色作為主色，乍看之下，仲以為係曼城。唔少網民趁機抽水，指兵工廠連續2季英超屈居曼城之下，成為亞軍，可能輸到口服心服，用呢件波衫向宿敵「致敬」。

阿仙奴呢件「藍月亮」球衣，細心睇其實有紫色花紋，由於隊徽及心口位置贊助商字樣都用深藍色，同2022/23年度曼城主場波衫有啲相似。兵工廠推出一款同死敵球衣相似嘅球衣，難免招來球迷批評，有人質疑有咁多顏色唔揀，點解係要用淺藍色。亦有人嘲諷兵工廠自從由阿迪達執教之後，已成為「曼城B隊」，呢件球衣啱晒佢哋。

不過，有唔少球迷讚阿仙奴今次設計有新意，令人眼前一亮，值得買番一件留念。