曼城財政違規案下月聆聽　明年1月定生死

曼城上年2月被英超賽會控告違反財務規定，涉及控罪達到115條，一旦罪成可能被罰降班。根據英國《每日郵報》報道，呢單球壇驚天大案將於9月中展開聆聽，有望明年1月宣判結果。

英超賽會經過4年調查，指曼城於2009至2018年共9年期間，違反多項財務規定，包括未有準確提供財政收入、領隊薪酬等，亦未有遵守財政公平規例，以及未有配合英超執法調查等。罪成可被判罰，包括扣分、被禁買賣球員、限制轉會上限，最嚴重係褫奪之前嘅聯賽冠軍、踢出英超，甚至完全踢出聯賽系統。

曼城已經否認一切指控，今年6月更加先下手為強，向英超賽會採取法律行動，控告對方針對及歧視「油資球會」，包括「關聯交易」條例有違法律原則。據悉曼城希望借推翻有關規例，創造成功案例，從而增加打甩財務違規嘅勝算。

曼城已連續4季奪得英超冠軍，屬於世界頂級豪門，若然真係被罰降班，震撼性一定大過2006年意甲冠軍祖雲達斯因為「電話門」假波案被罰降班一事。