沙特豪門出30億年薪利誘　「小雲」咁回應

根據西班牙《馬卡報》爆料，沙特阿拉伯豪門吉達艾阿里提出收購皇馬翼鋒雲尼斯奧斯祖利亞，並向呢位24歲巴西國腳開出球壇最高嘅3.5億歐元(約30億港元)年薪，吸引佢加盟。不過，皇馬無意放人，「小雲」亦拒絕去沙特搵食，莫非嫌錢腥？

據悉沙特聯賽全力協助吉達艾阿里簽入雲尼斯奧斯祖利亞，皆因睇好佢可以獲得金球獎，當局希望引入1位金球獎得主到當地比賽，為主辨2034年世界盃造勢。雖然沙特聯賽現時已經C朗及賓施馬兩位前金球獎得主，但兩人已屆退休年齡，唔適合作為2034年世界盃代言人。

「小雲」年輕當打，成為沙特方面嘅目標人選，今次開出3.5億歐元年薪，遠高於C朗現時效力艾納斯嘅2億歐元年薪，亦係「小雲」目前人工嘅30倍。

不過，《馬卡報》指雲尼斯奧斯祖利亞不為所動，希望繼續效力皇馬，佢仲有3年合約在身，解約金達10億歐元，恐怕吉達艾阿里難以得手。事實上，兩位巨星美斯、基利安麥巴比都曾經拒絕沙特球會天價人工利誘，證明好多球星並非將金錢放第1位。