【官宣】雲比沙卡轉投韋斯咸　簽約7年

韋斯咸周二（13日）宣布，由曼聯簽入26歲英格蘭右閘雲比沙卡，簽約7年，據報轉會費1,500萬鎊（約1.5億港元），曼聯官方亦發文宣布雲比沙卡離隊，祝佢一切順利。

韋斯咸官網公告，歡迎雲比沙卡加盟「鐵鎚幫」，附圖上有蜘蛛標誌，配合雲比沙卡「蜘蛛人」嘅外號，仲有由水晶宮到曼聯嘅生涯紀錄。

據報曼聯收到雲比沙卡1,500萬鎊轉會費後，該筆轉會費就會用嚟支付拜仁慕尼黑後衞馬沙拉奧嘅相關費用，幾乎係一手交一手。

雲比沙卡於水晶宮青訓出身，2019年夏天以5,500萬鎊轉會費加盟曼聯，效力5季，佢同曼聯合約到明年夏天到期，依家提前離隊。

韋斯咸今季換帥，由盧比迪古取代莫耶斯，今夏重磅收購有狼隊隊長麥斯基爾文、列斯聯森馬維爾、多蒙特前鋒富克洛等，依家再簽入雲比沙卡，將以新領隊配合新陣容應付新球季。