干拿加歷查轉會半天吊　車路士叫佢放假

日前飛赴馬德里，準備加盟馬德里體育會嘅車路士中場干拿加歷查，結果臨門撻Q，交易告吹後，干拿加歷查現時半天吊，車路士叫佢唔使歸隊，放假等消息。

馬體會同車路士原本傾好晒，剛隨西班牙贏得奧運足球金牌嘅莫羅迪安加盟車路士，而干拿加歷查就轉投馬體會，但嚟到交易前夕，車路士突然中止簽入莫羅迪安，原因不明，連帶干拿加歷查加盟馬體會亦hold住。

據報干拿加歷查近日住喺馬德里酒店，只能獨自操練，交易告吹後返回倫敦，原本打算返車路士練波，但又被通知暫時放假，等待馬體會同相關人員討論轉會下一步點做。

車路士為解決財政問題，一定要出售干拿加歷查，目標係收回至少3,500萬歐元(約3億港元)，而馬體會並未放棄，雙方都希望搵出一個理想方案。