費倫巴治歐聯出局　寸王轉戰歐霸或鬥曼聯

周三(14日)凌晨歐聯第3圈外圍賽，由摩連奴執教嘅費倫巴治慘被里爾踢出局，「寸王」賽後炮轟球證執法。費倫巴治將會「降格」參加歐霸盃，令摩連奴有機會再同曼聯交手。

費倫巴治係上季土超亞軍，夏天重金禮聘摩連奴執教，不過喺歐聯慘遇滑鐵盧，第3圈外圍賽首回合作客里爾輸1比2後，周三返主場再戰，踢到補時靠對手擺烏龍，總比數追成2比2要踢加時。去到118分鐘出現爭議一幕，約拿芬大衞射門省中費倫巴治守將隻手，VAR介入判12碼，約拿芬大衞親自操刀射入，帶領里爾總比數贏3比2晉級。

摩連奴賽後極度不滿球證執法：「我哋可以喺歐霸盃拎到好成績，不過如果......我都係唔好講，講完我會有大麻煩，唔好提12碼，只有球證同VAR先知判12碼嘅原因，我以呢隊波為榮。」費倫巴治仍然可以進身歐霸盃分組賽，佢曾經執教過嘅曼聯同熱刺都會參加呢項賽事，摩連奴有望倒戈。