高爾彭馬續約至2033年　遭嘲諷似坐監

車路士中場高爾彭馬上季英超轟入22球及11次助攻，表現極之出色，即使原本仲有6年合約在身，會方都急不及待開出新約綁實呢位22歲英格蘭國腳，宣布同佢續約至2033年。由於合約長達9年，網民趁機抽水，嘲諷高爾彭馬似坐監。

高爾彭馬上季由曼城加盟車路士，當時已簽下7年合約至2030年，佢憑優秀表現奠定核心地位，各項賽事上陣45場入25球，其中英超入22球，僅次於入27球嘅神射手得主艾寧夏蘭特。

車路士開出新約留住高爾彭馬，原本都算合理，但續約至2033年，遠比球壇上普遍合約長，令人咋舌。事實上，車仔近年都同新加盟球員簽超長約，據悉主因係要攤分每年成本，避免違反英超財政條例。

高爾彭馬續約後話：「我效力車路士首季獲益良多，希望繼續經歷美好事情，為自己及球會取得成功，贏得更多錦標。」不過，唔少網民嘲諷高爾彭馬今次簽咗「賣身契」、「坐9年監」，亦有人認為佢完成唔到9年約，甚至會轉投阿仙奴，就好似夏維斯一樣。