英超VAR大突破　社交網即時解釋判決

英超VAR上季錯漏百出，被球迷同球會踩到體無完膚，新一季進行大改革，英超聯賽會周三(14日)宣布推出破格措施，成立社交平台X官方新帳號，以「接近即時」嘅方式解釋球證場上判決，增加透明度。

英超聯賽會宣布：「英超喺24/25球季開鑼前，喺社交平台X開通@PLMatchCentre，將以接近即時嘅方式，提供每場英超球場上嘅判決同資訊，包括球證同VAR做出決定嘅過程。」

呢個措施得到唔少球迷支持，認為可以增加透明度，不過亦有部份球迷質疑，指出如果英超球證並冇提升執法水平，呢個X帳號只會淪為網民「食花生」，以及PGMOL就錯判道歉嘅平台。