阿仙奴門將外借西甲　國家隊上陣多過球會

阿仙奴周二(13日)宣布，夏天續約嘅愛沙尼亞門將海恩被外借西甲華拉度列一季，呢位22歲年輕球員喺季前熱身有唔錯表現，而且又係國家隊正選，今次轉戰西甲有望大展身手。

阿仙奴青訓出身嘅海恩，目前係球隊3號門將，夏天同球會續約後，之前喺美國之旅表現突出，包括喺對般尼茅夫嘅熱身賽兩救12碼，為尋找上陣機會，阿仙奴決定將佢外借西甲新升班嘅華拉度列。

有趣嘅係，海恩出道以來只係為阿仙奴踢過1場英聯盃，2年前外借雷丁上陣過5場，即係只得6次球會上陣經驗，不過佢就係愛沙尼亞國家隊No.1，踢過世盃外、歐國外同歐國聯等賽事，年紀輕輕就有30場國際賽經驗。