阿仙奴门将外借西甲　国家队上阵多过球会

阿仙奴周二(13日)宣布，夏天续约嘅爱沙尼亚门将海恩被外借西甲华拉度列一季，呢位22岁年轻球员喺季前热身有唔错表现，而且又系国家队正选，今次转战西甲有望大展身手。

阿仙奴青训出身嘅海恩，目前系球队3号门将，夏天同球会续约后，之前喺美国之旅表现突出，包括喺对般尼茅夫嘅热身赛两救12码，为寻找上阵机会，阿仙奴决定将佢外借西甲新升班嘅华拉度列。

有趣嘅系，海恩出道以来只系为阿仙奴踢过1场英联杯，2年前外借雷丁上阵过5场，即系只得6次球会上阵经验，不过佢就系爱沙尼亚国家队No.1，踢过世杯外、欧国外同欧国联等赛事，年纪轻轻就有30场国际赛经验。