馬體會有「Plan B」　力斟尼高路簡迪

西甲勁旅馬德里體育會收購車路士中場干拿加歷查，交易告吹後，啟動「B計劃」，轉移目標斟介法國老將尼高路簡迪，呢位33歲伊蒂哈德中場闊別1年之後，有望重返歐洲聯賽搵食。

根據英國《每日郵報》爆料，馬體會方面已經聯絡尼高路簡迪嘅代表，商討加盟可能性，呢位前車路士球星上年6月約滿離開車仔，加盟沙特阿拉伯球隊伊蒂哈德，簽約3年。雖然尼高路簡迪仲有2年合約在身，但估計轉會費遠低於干拿加歷查，相信馬體會要簽入佢並唔難。

尼高路簡迪上季為伊蒂哈德各項賽事上陣46場有4球進帳，並為法國出戰今屆歐國盃，表現出色，首2場分組賽都當選最佳球員，可見佢寶刀未老，絕對有能力喺西甲立足。