賓福特願外借艾雲東尼　曼聯車路士等機會

賓福特前鋒艾雲東尼一直被傳今個夏天轉會，不過6,000萬鎊嘅叫價就令有興趣球會卻步，據英國《獨立報》報道，賓福特將會願意用「先借後賣」方式放人，傳聞曼聯同車路士都打算喺轉會窗尾段出手搶人。

艾雲東尼同賓福特合約只剩1年，而且一直拒絕續約，明年有機會自由轉會。賓福特叫價6,000萬鎊無人問津，據報佢哋為免人財兩失，將同意先將佢外借，再加入「強制買斷」條款，呢個做法可以令買家先得到艾雲東尼，同時避免違反財政條例嘅風險。賓福特上年賣大衞拉耶去阿仙奴，正正就係用呢個方法。

據《獨立報》報道，曼聯同車路士都有意「先借後買」艾雲東尼，其中以車路士最有機會，佢哋遲遲未搵到合適嘅新前鋒目標，收購西班牙奧運隊前鋒奧羅莫迪安又臨時告吹，唔排除會再打艾雲東尼主意。