曼聯繼續增兵　有望免費簽西班牙鐵衞

曼聯簽入2位防線大將馬菲斯迪歷特、馬沙拉奧之後，增兵行動仍然未結束，根據西班牙傳媒爆料，紅魔鬼正在力斟今夏約滿離開馬體會嘅後衞馬里奧靴莫素，希望進一步提升防線實力。

現年29歲嘅馬里奧靴莫素出身於皇馬青訓系統，其後轉投愛斯賓奴，2019年加盟馬體會，為呢支西甲勁旅總共上陣174場，並有10球進帳，包括上季踢45場入2球。

雖然馬里奧靴莫素屬於馬體會主力，但拒絕續約，今夏自由身離隊，早前傳出國際米蘭及多支沙特阿拉伯球隊，向佢開出高薪合約，但呢位前西班牙國腳都拒絕。

曼聯現時亦加入爭奪戰，向馬里奧靴莫素開出600萬歐元(約5,100萬港元)年薪，如果成事，紅魔鬼就會出售隊內中堅域陀連迪路夫。馬里奧靴莫素除咗司職中堅之外，亦可以勝任左後衞，有助領隊坦哈格靈活調動。