耶馬爸爸遇刺　警拘3人控意圖謀殺

西甲新球季今個星期開鑼前，爆出駭人血腥事件。巴塞隆拿「大紅人」拉明耶馬屋企出現嚴重事故，據報佢爸爸周四(15日)喺停車場遇刺，一度傳出「身中多刀」。最新消息稱耶馬爸爸並無生命危險，而警方就拘捕3名疑犯，將起訴意圖謀殺。

17歲嘅耶馬喺歐國盃大紅大紫，佢嘅35歲爸爸Mounir Nasraoui亦全程現場為佢打氣。報道指Nasraouia日前外出放狗嗰陣，喺停車場同人發生爭執，之後更被人用刀刺傷。由於一直未有官方證實，令傳聞四起，當地媒體《La Vanguardia》指Nasraoui「身中多刀、情況嚴重」，不過之後《世界體育報》、《Relevo》等都指Nasraoui並冇生命危險，甚至可以返屋企養傷，但實際情況仍有待確認。

有閉路電視片段影到Nasraoui喺遇襲前，曾經同數人發生爭執，並且有警察介入調停。西班牙《世界報》就指，警方已經拘捕3名疑犯，並會起訴意圖謀殺罪名，而案件仍然喺調查當中。巴塞隆拿將會喺周日(18日)凌晨作客華倫西亞，未知事件會唔會影響耶馬上陣。