曼城開咧前收噩耗　「新彭馬」骨折長抖

衞冕英超嘅曼城今個夏天表現淡靜，只係簽入巴西翼鋒沙維奧，領隊哥迪奧拿按兵不動最大原因，係超新星奧斯卡波比成功上位，勢估唔到開咧前傳出噩耗，呢位21歲「新高爾彭馬」喺訓練期間受傷，腳部出現骨折，據報要長抖3至5個月時間。

挪威國腳奧斯卡波比係曼城青訓產品，據英國《衞報》報道，哥迪奧拿上年同意賣高爾彭馬去車路士，全因佢睇好奧斯卡波比可以更加成功，上季各項賽事曾26次上陣，隨住祖利安艾華利斯離隊，奧斯卡波比將扮演更重要角色，上場社區盾對曼聯就正選上陣兼交出助攻，被睇好今季大爆發。

英國傳媒報道，奧斯卡波比日前操練嚴重受傷，懷疑腳部骨折，曼城正考慮送佢去西班牙接受專家診斷，初步估計養傷期要3至5個月。今次傷患或會逼曼城喺轉會窗關閉前出手買人，傳聞水晶宮嘅伊比爾治伊斯同利物浦嘅路易斯迪亞斯都係目標之一。