冇頭髮有辦法?豪門主帥新季英超光Fight歲月
2024年08月15日 18:00
東網電視
更多新聞短片
![](/hk/bkn/cnt/sport/20240815/photo/bkn-20240815180048504-0815_00882_001_01p.jpg?20240815180048)
十個光頭九個富,新一季英超掀起「光頭領隊」熱潮,爭做最富強勁旅!兩大豪門利物浦、車路士一齊換帥,新領隊施洛,馬利斯卡不約而同都係冇頭髮,同曼市雙雄領隊哥迪奧拿、坦哈格互相輝映,揭開英超「光Fight歲月」大比併。
【曼城衞冕曼城衞冕 靠晒哥帥DNA】
曼城上季歷史性實現英超「4連冠」霸業,亦係哥迪奧拿領軍8個球季第6次封王,計埋哥帥加盟曼城前,亦為拜仁完成德甲3連冠,即係話哥迪奧拿近11個球季,有9季帶領球隊贏聯賽冠軍,聯賽奪冠率超過8成!
正所謂無敵是最寂寞,哥迪奧拿前季幫曼城贏埋歐聯冠軍兼做3冠王後,上季驚險壓倒阿仙奴衞冕英超,佢喺捧盃後表示贏盡所有,喺球場已「無欲無求」,暗示離開之日不遠,佢同曼城合約明夏完結,盛傳今季可能係哥迪奧拿最後一季執教「藍月亮」。
近11季9度封王聯賽
曼城今夏未有重大收購,只由「兄弟球會」基羅納「調動」翼鋒沙維奧來投,但祖利安艾華利斯就離隊,喺奇雲迪布尼又老一歲下,曼城衞冕難度大增。不過哥帥一日仲係領隊,曼城都係冠軍保證,開鑼前先贏社區盾,證明曼城仍然係大家熟悉嘅捧盃機器。
【意大利教頭 揸車堅一流】
車路士自從2022年5月被美國財團收購之後,已經4度換帥,今季請來馬利斯卡執教,呢位44歲意國少帥除咗師承哥迪奧拿之外,最關鍵係過往意大利籍領隊都可以為車仔創出佳績,作為「翻版哥帥」,馬利斯卡或者就係拯救車路士嘅「Mr Right」。
馬利斯卡跟過哥帥學法
安察洛堤、干地都曾協助車路士贏英超冠軍,沙利捧歐霸盃,迪馬堤奧臨危受命奪得歐聯冠軍,可見意大利主帥勁旺車仔。馬利斯卡喺呢個「光榮傳統」加持下,來季成績令人期待。雖然馬利斯卡教波資歷較淺,但勝在效率高,上季首度執教李斯特城,立即率領球隊成為英冠盟主升班。車仔班主保利出名心急,馬利斯卡擁有迅速化腐朽為神奇嘅力量,啱晒呢位美國富商。
此外,馬利斯卡曾經喺曼城擔任哥迪奧拿助教,學到唔少嘢,正如「師兄」阿迪達出「城」執教阿仙奴,令兵工廠成為爭標分子,馬利斯卡或者可以複製阿迪達成功之路。加上車路士繼續大開水喉增兵,又同高爾彭馬簽「賣身契」續約至2033年,馬利斯卡有大把材料,可以打造「超級戰車」,有力衝擊英超前4位。
【施洛有望延續 紅軍盛世】
利物浦今季進入「後高普時代」,唔少球迷都擔心球隊會步曼聯同阿仙奴後塵,喺費格遜、雲格離開後進入黑暗時期。喜出望外嘅係,新領隊施洛喺熱身賽展現出強勁魄力,短時間內令「紅軍」踢出悅目進攻足球,令人憧憬利物浦可以延續高普嘅盛世。
新星湧現唔使增兵
利物浦近年一直係曼城最大挑戰者,可惜上季受到高普宣布離隊影響,去到季尾後勁不繼無緣爭標,不過高普近年亦孕育出一批年輕新血,加上中前場仲留低穆罕默德沙拿、達雲紐尼斯、阿歷斯麥亞里士打等一手好牌,荷蘭領隊施洛承繼一個良好嘅班底同根基,唔擔心會一落千丈。
利物浦經歷高層大變動,今個夏天仍未有大動作增兵,但預計會物色一名頂級中場增強實力,事實上利物浦唔少新星已展示出接班能力,季前熱身連挫阿仙奴同曼聯兩大勁敵,新一季有望保持爭標分子嘅角色。
【曼聯再爆傷兵 潮坦克咪又一樣?】
曾經盛傳今夏換帥嘅曼聯,最終選擇同「坦克」坦哈格續約,令魔迷噓聲四起,幸好新股東「拉爵」拉特克利夫夠闊綽,大開水喉增兵重建球隊,率先斥資近1.5億鎊(約15億港元)買人,並請傳奇射手雲尼斯達萊回巢擔任助教,提升拉舒福特等前鋒嘅射術。不過,未開咧紅魔先爆發傷兵潮,並喺社區盾互射12碼不敵曼城,似乎黑氣未除。
新兵約路長抖簽拜仁孖寶頂檔
曼聯上季聯賽僅以第8位過終點,創下球會英超史上最低排名紀錄,坦哈格將成績差歸咎於太多傷兵。「拉爵」今夏迅速行動,放走兩位「玻璃腳」華拉尼、安東尼馬迪爾,並收購18歲法國天才中堅蘭尼約路、荷蘭前鋒約舒亞舒克斯,近日再簽入兩位拜仁慕尼黑後衞馬菲斯迪歷特、馬沙拉奧,誓要洗脫「病夫球隊」污名。
點知身價達5,200萬鎊(約5.2億港元)嘅蘭尼約路踢熱身賽受重傷,長抖3個月,前鋒海倫亦要養傷6星期,加上左後衞勞基梳爾又受傷,將缺陣1個月,傷兵潮可能進一步惡化。英國傳媒曾經指「拉爵」上季要求徹查多傷兵原因,包括檢討訓練方法,睇來搵到「真兇」之前,紅魔鬼難以翻身。
【阿仙奴補守 爭冠最後拼圖?】
連續兩季英超屈居亞軍嘅阿仙奴,經過前幾年刻意加強中前場,有加比爾捷西斯、夏維斯助陣下攻力大大提升,上季攻入91粒,僅次於冠軍曼城,今夏將增兵重心放在防守上,成功從博洛尼亞簽入意大利國腳卡拉科利,誓要擺脫「二奶命」魔咒。
卡拉科利能勝任中堅及左閘,防守了得之餘,用波亦唔錯,可從後場組織進攻,令幾乎全勤嘅中堅威廉沙列巴同加比爾馬加希斯有得抖吓,而近年客串左閘嘅辛真高與積及基奧柯,唔係防守唔掂就係助攻力弱,卡拉科利加盟正好填補呢個漏洞,亦好適合主帥阿迪達嗰種按比賽形勢,於閘位與中堅不停切換嘅戰術。
況且,卡拉科利有同胞佐真奴費路做盲公竹,有助呢位「新尼斯達」盡快融入球隊;至於上季來投嘅祖利安添巴亦已康復,情況等同新加盟一樣,二人絕對有望成為兵工廠爭冠最後拼圖。
【熱刺增鋒 開攻衝前4】
熱刺喺主帥普斯迪高路領導下打出高強度嘅逼搶戰術,上季季初一度盤據榜首,可惜板櫈深度明顯不足,後勁不繼下最終只排第5位,連歐聯入場券都保唔住,尤其係哈利卡尼上季臨開季前轉投拜仁,接替佢隊長一職嘅孫興民腳風欠順時,前線立即啞火,因此今夏重金收購般尼茅夫箭頭蘇蘭基。
蘇蘭基於2019至2024年效力般尼茅夫期間,216次上陣攻入77球,單計上季聯賽就有19球進帳,與菲爾科頓、奧尼屈堅斯並列入波第2多嘅「土炮」,僅次於車仔嘅高爾彭馬。蘇蘭基既有制空力,速度同射術亦唔曳,熱刺亦以破球會紀錄嘅6,500萬鎊,將呢位車仔出身嘅射手帶返嚟倫敦,彌補番哈利卡尼離隊嘅空缺,連同列斯聯中場艾治格雷來投,配合原有嘅「老孫」、占士麥迪臣等,有力衝擊前4。
【嘥位定驚喜?維拉旨意艾美利】
阿士東維拉上季取得英超第4名,今季進軍歐聯,但係維拉始終並非Big6,財力又遠不如紐卡素,即使有錢如紐卡素,上季歐聯出局後亦於聯賽崩潰,因此好多評論都唔睇好維拉,甚至認為該隊喺歐聯「嘥一個英超位」。
維拉征戰歐聯唯一憑藉,就係外號「歐霸之王」嘅主帥艾美利,佢上季帶隊打入歐協聯4強,但係歐協聯同歐聯相差兩級,競賽水平差天共地,有一個可能,就係踢完歐聯分組賽轉戰歐霸盃,到時先係艾美利嘅戰場。
話雖如此,維拉既然有機會征戰歐聯,會方都唔手軟增兵落重本,包括簽入阿馬度奧拿拿、伊恩馬特臣,仲有天才翼鋒森姆爾伊寧,但就賣走杜格拉斯雷斯同穆沙戴亞比,人腳其實冇加冇減,今季喺聯賽同歐洲賽攞到咩成績,都係視乎每場都「gel頭」嘅艾美利點調教。
【3支升班軍李城反而最危】
上季英超3支升班球隊般尼、錫菲聯及盧頓,不約而同只得1季貨仔就降番落英冠,今季3個熟悉嘅名字李斯特城、葉士域治同修咸頓又重返英超,佢哋能唔能夠避免做升降機呢?
李斯特城能夠成為英冠一哥,直接取得升班資格,最大功勞肯定係領隊馬利斯卡,但係呢名意大利教頭畀車路士撬走,換嚟嘅係前季幫諾定咸森林成功護級嘅谷巴。不過「狐狸」球迷非常質疑管理層嘅選擇,仲話谷巴有機會破英超領隊最短時間被炒紀錄。李斯特城喺熱身賽表現確實一無是處,好彩季初對手唔算太強,希望捱過頭浸會有好轉。
葉士域治離開頂級聯賽22年,由前曼聯教練基蘭麥堅拿於2021年接手後,2022/23年就助球隊由英甲升上英冠,上季再即刻升上英超,球隊踢法進取有活力,只要提升後防力量,有望留番喺英超。
至於靠升班附加賽擊敗列斯聯、取得英超席位嘅修咸頓,上季控球比率高達66.1%,冠絕英冠,少帥羅素馬田崇尚傳控,呢種與時代並進嘅踢法,相信有助提升佢哋喺英超嘅競爭力。