熱刺宣布罰比蘇馬停賽　普帥：需要重建信任

熱刺周二(20日)凌晨英超首戰作客李斯特城，將有中場大將比蘇馬停賽。熱刺領隊普斯迪高路周四(15日)證實，日前公然違法吸笑氣嘅比蘇馬已被內部停賽，並指佢需要同球隊重建信任關係。

普斯迪高路喺賽前記者會表示：「我哋罰比蘇馬下場停賽，佢仲需要同我、同隊友重建信任，呢個係佢停賽以外更需要努力做到嘅事情，我希望可以幫佢明白，佢所有決定影響嘅唔止係佢自己。」

比蘇馬日前喺Snapchat公開自己喺夜店吸笑氣影片，而英國上年已立法禁止管有或使用笑氣作娛樂用途，比蘇馬事後作出公開道歉，承認自己「判斷錯誤」。