【官宣】馬高列奧斯投銀河：我要捧盃！

美職勁旅洛杉磯銀河周五(16日)宣布，球隊同德國球星馬高列奧斯簽約2年半，呢位前多蒙特中場有望喺8月25日對阿特蘭大聯一戰首演，佢已表明目標係要贏美職冠軍。

35歲嘅馬奧列奧斯結束12年多蒙特生涯後，周五正式飛洛杉磯簽約，繼碧咸、伊巴謙莫域、羅比堅尼同謝拉特等名將後，成為洛杉磯銀河另一位Icon。銀河總經理觀斯表示：「馬高列奧斯係世界級球星，參與過歐聯決賽、世界盃等最高水平賽事，佢嘅加盟係對銀河發展大計嘅肯定。」

馬高列奧斯亦表明捧盃係佢轉戰美職嘅最大目標：「我嚟美國，目標當然係同隊友一齊將冠軍帶返屋企，同埋我要證明自己，雖然已經35歲，但我仍然覺得充滿能量。」洛杉磯銀河目前排喺西岸榜首，美職依家有個小暫停，銀河下場聯賽係25日對阿特蘭大聯，預計會係馬高列奧斯首演。