「人球」加雲菲臘斯有着落　外借葉士域治

曼城中場加雲菲臘斯將再次面臨外借命運，根據「轉會權威」記者羅曼諾(Fabrizio Romano)爆料，「藍月亮」已經同意將呢位28歲英格蘭國腳外借去英超新升班球隊葉士域治，為期1季。

加雲菲臘斯兩年前由列斯聯轉投曼城，當時轉會費達4,200萬鎊(約4.2億港元)，但呢位中場經常受傷，入「城」後首季英超僅上陣12次，今年1月被外借去韋斯咸，表現差劣，最終被退貨。曼城領隊哥迪奧拿早已經打算出售加雲菲臘斯，但冇球會願意接貨，惟有退而求其次，接受葉士域治借用要求。

加雲菲臘斯仍然有4年合約在身，相信未來一段長時間，都要繼續做「人球」被踢來踢去。