巴塞又出事　貴價新兵奧莫未能註冊

巴塞隆拿將於周日(18日)凌晨新一季西甲首仗作客華倫西亞，但教練費歷克面臨重大難題，有6位球員仍未註冊，包括身價達6,000萬歐元(約5.1億港元)嘅新加盟中場丹尼爾奧莫。

巴塞隆拿以往曾經因為球員總薪酬超出西甲規定上限，而未能為球員註冊，現時又出現同樣情況，並且未符合平衡財政要求，需要再獲得2,000萬歐元(約1.7億港元)收入先至達標。

據悉巴塞隆拿目前只有19位球員完成註冊，另有6位球員「待定」，包括丹尼爾奧莫、柏奧域陀、恩尼高馬天尼斯、洛基費拉拿、柏保路托利、阿歷斯華利，意味6人好大機會無法上陣對華倫西亞。

當中以丹尼爾奧莫未能註冊影響最大，皆因會方視呢位西班牙國腳為新中場核心，如果佢缺陣，勢必打亂教練費歷克嘅部署。此外，防線人腳不足，如果中堅恩尼高馬天尼斯唔踢到，亦會造成沉重打擊。不過，巴塞以往試過最後關頭完成註冊手續，今次或者都可以大步檻過。