英超球證新指引　阿仙奴成大輸家？

英超嘅球證執法水平近年備受批評，新一季賽事展開前，賽會再推出多項新指引，其中一項關於死球進攻嘅修改，據報將會嚴厲禁止騷擾、阻礙門將同防守球員移動，阿仙奴好可能成為新指引下嘅大輸家。

阿仙奴上季有22個死球入波(唔計12碼)，當中16次靠角球建功，死球教練祖華嘅戰術居功至偉。不過，阿仙奴嘅死球戰術入面，往往有大量「單擋」，甚至派出「專人」賓韋特去騷擾對方門將，但呢種方法喺新球季未必行得通。

據報英超球例新指引，講明會喺角球、罰球期間加強保護防守球員，進攻球員做出騷擾、阻擋、拉扯等動作都會更嚴厲捉拿，對阿仙奴嘅死球戰術會係一大打擊。