英超揭幕戰 曼聯升呢劫富搶頭威
2024年08月16日 18:01
東網電視
更多新聞短片
![](/hk/bkn/cnt/sport/20240816/photo/bkn-20240816180107009-0816_00882_001_01p.jpg?20240816225237)
英超曼聯主場硬撼富咸。
新一季英超周六(17日)凌晨揭開戰幔,打頭陣係曼聯主場硬撼富咸。「紅魔鬼」今夏買人極具效率,馬菲斯迪歷特等相繼加盟,全面升呢,雖然呢班新兵未必可立即披甲,但起到「鯰魚效應」,刺激起一眾舊將鬥心,加上近年碰頭食住富咸,今仗可藉地利打響頭炮,主勝有計。(Now 621及611周六凌晨3時直播)
曼聯自從班主拉特克利夫入主後,一改近年慢吞吞嘅作風,「拉爵」留用奪英足盃續命嘅主帥坦哈格,而買人效率高兼具針對性,先有蘭尼約路同約舒亞舒克斯來投,近日更從拜仁打包馬菲斯迪歷特同馬沙拉奧,其中後兩者係坦Sir執教阿積士嗰陣嘅舊部,連同原有嘅奧拿拿及利辛度馬天尼斯,重組2019年殺入歐聯4強嘅阿積士防線。
當然,馬菲斯迪歷特同馬沙拉奧啱啱先嚟,今場未必即刻上陣,蘭尼約路又重傷有排抖,坦Sir要求從後場組織進攻嘅戰術暫時要等等先。不過「拉爵」連番買人,確係顯出復興紅魔嘅決心,亦激起一眾舊將唔敢再hea,日前社區盾面對死敵曼城,全場表現較佳之下,最終互射12碼輸波堅唔抵,除咗拉舒福特曳啲之外,睇得出般奴費南迪斯、阿歷真度加拿祖等主力表現搶韁,希望在新季證明自己,絕對係好事。
另邊廂,富咸今夏簽入伊美路維、賴恩施斯隆等北倫敦雙雄棄將,其中路維加盟冇耐頻有入波,極速融入,不過佢哋放走防中祖奧包連夏,冇咗呢位葡萄牙悍將作防線前屏障,似乎得不償失。翻查紀錄,兩軍近5次交手,「紅魔鬼」贏咗4次,擺明格食格,開鑼戰梗係想攞頭威,主勝捧得過。
更多賠率: